ઈન્ડિયન પ્રીમિયર લીગ (IPL) 2024ની 67મી મેચમાં લખનઉ સુપર જાયન્ટ્સે મુંબઈ ઈન્ડિયન્સને 18 રનથી હરાવ્યું. મુંબઈએ હોમ ગ્રાઉન્ડ વાનખેડે સ્ટેડિયમમાં ટોસ જીતીને પ્રથમ બોલિંગ કરવાનું પસંદ કર્યું. લખનઉએ 20 ઓવરમાં 6 વિકેટે 214 રન બનાવ્યા હતા. જવાબમાં મુંબઈની ટીમ 20 ઓવરમાં 6 વિકેટે 196 રન જ બનાવી શકી હતી.
મેચમાં, MIના નેહલ વાઢેરાએ બેકવર્ડ પોઈન્ટ પર જમ્પિંગમાં એક શાનદાર કેચ કર્યો હતો. MIના કૃણાલ પંડ્યાએ છેલ્લી ઓવરમાં શાનદાર ફિલ્ડિંગ કરીને સિક્સ બચાવી હતી, જ્યારે લખનઉએ 3 બોલમાં સતત 3 વિકેટ ગુમાવી દીધી હતી. MI vs LSG મેચની ટોપ મોમેન્ટ્સ…
1. નેહલ વાઢેરાનો જમ્પિંગ કેચ
નેહલ વાઢેરાએ 10મી ઓવરમાં શાનદાર જમ્પિંગ કેચ ઝડપી લીધો હતો. પિયુષ ચાવલાએ ઓવરનો ત્રીજો બોલ ફૂલર લેન્થ ફેંક્યો હતો. દીપક હુડ્ડાએ ઇનસાઇડ આઉટ શોટ રમ્યો પરંતુ બોલ પોઇન્ટ તરફ ગયો. અહીં વાઢેરાએ હવામાં કૂદીને એક શાનદાર કેચ ઝડપી લીધો હતો. હુડ્ડા 9 બોલમાં 11 રન બનાવીને આઉટ થયો હતો.
2. DRSમાં સ્ટોઇનિસ બચ્યો
લખનઉ તરફથી નંબર 3 પર બેટિંગ કરવા આવેલા માર્કસ સ્ટોઈનિસ DRS લેવાના કારણે બચી ગયો હતો. બીજી ઓવરના ત્રીજા બોલ પર અર્જુન તેંડુલકરે ઇન-સ્વિંગર બોલ ફેંક્યો હતો. બોલ સ્ટોઇનિસના પેડ સાથે અથડાયો, MIએ LBW માટે અપીલ કરી અને અમ્પાયરે આઉટ જાહેર કર્યો.
સ્ટોઇનિસે રિવ્યુ લીધો, રિપ્લેમાં બોલ સ્ટમ્પને મિસ કરતા જતો દેખાતો હતો. ફિલ્ડ અમ્પાયરે પોતાનો નિર્ણય બદલી નાખ્યો અને એક રનના સ્કોર પર સ્ટોઇનિસને જીવનદાન આપવામાં આવ્યું. સ્ટોઇનિસે 22 બોલમાં 28 રન બનાવ્યા હતા.
3. લખનઉએ 3 બોલમાં 3 વિકેટ ગુમાવી
એક સમયે લખનઉ સુપરજાયન્ટ્સનો સ્કોર 178/3 હતો પરંતુ આ સ્કોર પર ટીમે સતત 3 વિકેટ ગુમાવી દીધી હતી. નુવાન થુષારાએ 17મી ઓવરના પાંચમા અને છઠ્ઠા બોલ પર નિકોલસ પૂરન અને અરશદ ખાનને પેવેલિયન મોકલી દીધા હતા. પીયૂષ ચાવલાએ 18મી ઓવરના પહેલા બોલ પર કેએલ રાહુલની વિકેટ લીધી હતી.
4. વરસાદના કારણે મેચ અટકી હતી
બીજા દાવ દરમિયાન વરસાદના કારણે મેચ રોકવી પડી હતી. રાત્રે 10 વાગ્યાની આસપાસ વરસાદ શરૂ થયો હતો, જે દરમિયાન મુંબઈનો સ્કોર 3.5 ઓવરમાં વિના વિકેટે 33 રન હતો. રોહિત શર્મા 20 અને ડીવાલ્ડ બ્રેવિસ 9 રને રમી રહ્યા હતા. કૃણાલ પંડ્યાની ઓવર હજુ પૂરી થવાની બાકી હતી. 50 મિનિટ પછી રમત ફરી શરૂ થઈ અને પંડ્યાએ તેની ઓવર પૂરી કરી.
5. નમન ધીરને જીવનદાન, અમ્પાયરે નો-બોલ આપ્યો
મુંબઈના બેટર નમન ધીરને MIની ઈનિંગની 18મી ઓવરમાં જીવનદાન મળ્યું હતું. નવીન-ઉલ-હકની ઓવરના બીજા બોલ પર તેનો કેચ થયો હતો, લખનઉના ખેલાડીઓએ જશ્ન મનાવવાનું શરૂ કર્યું, પરંતુ અમ્પાયરે તેને નો બોલ જાહેર કર્યો. આવી સ્થિતિમાં ધીરને પણ ફ્રી-હિટ મળ્યો.
6. કૃણાલ પંડ્યાની શાનદાર ફિલ્ડિંગ, 5 રન બચાવ્યા
MIને છેલ્લી ઓવરમાં 34 રનની જરૂર હતી. નવીન-ઉલ-હકના પ્રથમ બોલ પર નમન ધીરે સિક્સર ફટકારી હતી. આ પછી, નમન ફરીથી આગલા બોલ પર સિક્સર માટે ગયો. જો કે, કૃણાલે લોંગ-ઓફ પર શાનદાર ફિલ્ડિંગ કરતી વખતે બાઉન્ડ્રી પર ડાઈવ મારી અને સિક્સ રોકી. તેણે નોન-સ્ટ્રાઈકરના છેડે બોલ એટલી ઝડપથી ફેંક્યો કે નમન માત્ર એક રન પૂરો કરી શક્યો.
