ગુજરાત વિધાનસભાના બજેટ સત્રમાં આજે નાણામંત્રી કનુ દેસાઈ સતત પાંચમી વખત બજેટ રજૂ કરીને નવો રેકોર્ડ સ્થાપિત કરવા જઈ રહ્યા છે. આ બજેટ ‘વિકસિત ગુજરાત @ 2047’ ના વિઝન સાથે રજૂ કરવામાં આવશે, જેમાં મધ્યમ વર્ગ અને યુવાનો માટે મોટી જાહેરાતોની શક્યતા છે.
રૂ. 4 લાખ કરોડનો મેજિક ફિગર: ગુજરાત રચશે નવો ઈતિહાસ
નિષ્ણાતોના મતે આ વર્ષે ગુજરાતનું બજેટ કદ પ્રથમ વખત રૂ. 4,00,000 કરોડની ઐતિહાસિક સપાટીને વટાવી શકે છે. રાજ્યની વધતી જીડીપી અને ઈન્ફ્રાસ્ટ્રક્ચર પ્રોજેક્ટ્સને કારણે બજેટમાં આ મોટો ઉછાળો જોવા મળી શકે છે.
– મિશન 2030/2036: ઓલિમ્પિક અને કોમનવેલ્થ ગેમ્સ માટે ફાળવાશે મોટું ભંડોળ
– ગુજરાત 2030ની કોમનવેલ્થ ગેમ્સ અને 2036ના ઓલિમ્પિક માટેની તૈયારીઓ તેજ કરી રહ્યું છે.
– સ્પોર્ટ્સ સિટી: અમદાવાદના મોટેરા અને નારણપુરાને ‘વર્લ્ડ ક્લાસ સ્પોર્ટ્સ ડિસ્ટ્રિક્ટ’ બનાવવા ₹2,000 થી ₹5,000 કરોડની જોગવાઈ થઈ શકે છે.
– ખેલાડીઓ માટે ‘શક્તિદૂત’ યોજનાના બજેટમાં પણ વધારો થવાની ધારણા છે.
– ગ્રીન ગ્રોથ અને નેટ ઝીરો: ઈલેક્ટ્રિક બસોનો આવશે પૂર
– પર્યાવરણની સુરક્ષા માટે સરકાર ‘ગ્રીન બજેટ’ પર ભાર મૂકશે:
– જાહેર પરિવહનમાં 100% ઇલેક્ટ્રિક બસો લાવવા માટે ખાસ ફાળવણી.
– કચ્છ અને બનાસકાંઠામાં રિન્યુએબલ એનર્જી પાર્ક માટે પ્રોત્સાહન.
– ગ્રીન હાઇડ્રોજન મિશન માટે નવી સબસિડી જાહેર થઈ શકે છે.
– સેમિકન્ડક્ટર અને GIFT City: આંતરરાષ્ટ્રીય હબ બનાવવાની તૈયારી
– ધોલેરા અને સાણંદ: સેમિકન્ડક્ટર પ્લાન્ટ્સ માટે ઈન્ફ્રાસ્ટ્રક્ચર પાછળ મોટો ખર્ચ કરવામાં આવશે.
– GIFT City: બીજા ફેઝના વિસ્તરણ અને ફિન્ટેક યુનિવર્સિટીઓ માટે જમીન અને વિશેષ ગ્રાન્ટની જાહેરાત થઈ શકે છે.
– આરોગ્ય અને કૃષિ: PM-JAY માં મોટી રાહતની આશા
– PM-JAY: આયુષ્માન કાર્ડની મર્યાદામાં વધારો અથવા વધુ ગંભીર રોગોનો સમાવેશ થઈ શકે છે. આદિવાસી વિસ્તારોમાં નવી મેડિકલ કોલેજોની જાહેરાત થઈ શકે છે.
– ખેડૂત કલ્યાણ: ડ્રોન ટેકનોલોજીના ઉપયોગ અને વ્યાજ સહાય માટે નવી યોજનાઓ આવી શકે છે.
બજેટ 2026-27: નાણામંત્રી કનુ દેસાઈનો ઐતિહાસિક વિક્રમ અને રૂ.4 લાખ કરોડનો લક્ષ્યાંક
ગુજરાત વિધાનસભાના બજેટ સત્રના ત્રીજા દિવસે નાણામંત્રી કનુ દેસાઈ સતત પાંચમી વખત રાજ્યનું બજેટ રજૂ કરીને નવો ઈતિહાસ રચવા જઈ રહ્યા છે. આ વર્ષનું બજેટ માત્ર આંકડાઓ પૂરતું મર્યાદિત નથી, પરંતુ ‘વિકસિત ગુજરાત @ 2047’ ના વિઝનને સાકાર કરવા માટેનો એક મજબૂત રોડમેપ માનવામાં આવે છે. નિષ્ણાતોના મતે, રાજ્યમાં વધી રહેલા માળખાકીય રોકાણો અને સામાજિક કલ્યાણની યોજનાઓને પગલે બજેટનું કદ પ્રથમ વખત રૂ. 4,00,000 કરોડની ઐતિહાસિક સપાટીને વટાવી શકે તેવી પૂરેપૂરી શક્યતા છે.
મિશન 2030 અને ગ્રીન ગ્રોથ: રમતગમતથી લઈને ઊર્જા ક્ષેત્રે ‘માસ્ટરસ્ટ્રોક’
આગામી વર્ષોમાં યોજાનારી કોમનવેલ્થ ગેમ્સ 2030 અને ઓલિમ્પિક માટેની બિડને ધ્યાનમાં રાખીને બજેટમાં સ્પોર્ટ્સ ઇન્ફ્રાસ્ટ્રક્ચર માટે મોટી ફાળવણી થવાની ધારણા છે. ખાસ કરીને અમદાવાદના મોટેરા અને નારણપુરાને ‘વર્લ્ડ ક્લાસ સ્પોર્ટ્સ ડિસ્ટ્રિક્ટ’ તરીકે વિકસાવવા પર ભાર મૂકાશે. આ સાથે જ ‘ગ્રીન ગ્રોથ’ અંતર્ગત પર્યાવરણની જાળવણી માટે નેટ ઝીરો લક્ષ્યાંક, સોલાર પેનલ, ગ્રીન હાઇડ્રોજન મિશન અને જાહેર પરિવહનમાં 100% ઇલેક્ટ્રિક બસો લાવવા માટે સરકાર વિશેષ પ્રોત્સાહન આપી શકે છે.
શહેરી વિકાસ અને કૃષિ રાહત: ચૂંટણીલક્ષી જાહેરાતોની શક્યતા
રાજ્યમાં આગામી સમયમાં આવી રહેલી મહાનગરપાલિકાની ચૂંટણીઓને ધ્યાનમાં રાખીને શહેરી વિકાસ માટે મોટા પ્રોજેક્ટ્સની લહાણી થઈ શકે છે. મેટ્રો રેલના વિસ્તરણ, સ્માર્ટ સિટી અને ફ્લાયઓવર પ્રોજેક્ટ્સ માટે બજેટમાં ઉદાર ફાળવણી કરવામાં આવશે. બીજી તરફ, કૃષિ ક્ષેત્રે ખેડૂતો માટે વ્યાજ સહાય અને આધુનિક ખેતી માટે ડ્રોન ટેકનોલોજીના ઉપયોગને પ્રોત્સાહન આપતી નવી સ્કીમ્સ પણ આ બજેટનું મુખ્ય આકર્ષણ બની શકે છે.
બજેટની અંતિમ તૈયારીઓ: ગાંધીનગરમાં ઉત્સાહનો માહોલ
ગાંધીનગર સ્થિત નાણાં વિભાગના કાર્યાલય ખાતે બજેટની તમામ અંતિમ તૈયારીઓ પૂર્ણ કરી દેવામાં આવી છે. ઉચ્ચ અધિકારીઓ અને કર્મચારીઓની રાત-દિવસની મહેનત બાદ તૈયાર થયેલી બજેટ બૂક સુરક્ષિત રીતે વિધાનસભા ખાતે પહોંચાડવામાં આવી છે. વધતા જતા જાહેર દેવા વચ્ચે વિકાસની ગતિને કેવી રીતે જાળવી રાખવી તે સરકાર માટે એક મોટો પડકાર છે, છતાં પણ આ બજેટ દરેક વર્ગના લોકોની અપેક્ષાઓ પર ખરું ઉતરશે તેવો વિશ્વાસ વ્યક્ત કરવામાં આવી રહ્યો છે.
01:24 PM, 18th Feb
અમૃતકાળથી વિકસિત ગુજરાત @2047નો વિઝનરી રોડમેપ
મુખ્યમંત્રી ભૂપેન્દ્ર પટેલના નેતૃત્વમાં રાજ્ય સરકાર ‘વિકસિત ગુજરાત@2047’ના સંકલ્પને સાકાર કરવા મક્કમ છે. વર્ષ 2035માં ગુજરાતની સ્થાપનાના 75 વર્ષ પૂર્ણ થવાના છે, જેને એક સોનેરી અવસર ગણીને સરકાર અત્યારથી જ ‘ગુજરાત@2035’ ના રોડમેપ પર આગળ વધી રહી છે. નાણામંત્રી કનુ દેસાઈએ જણાવ્યું કે, વડાપ્રધાન નરેન્દ્ર મોદીએ શરૂ કરેલા ‘ખેલમહાકુંભ’ને કારણે જ આજે ગુજરાતને ‘કોમનવેલ્થ ગેમ્સ 2030’ની યજમાની મળી છે. આ રોડમેપ આગામી દાયકામાં રાજ્યની વિકાસયાત્રાને નવી ઊંચાઈ પર લઈ જશે, જેમાં ઈન્ફ્રાસ્ટ્રક્ચર, રમતગમત અને વૈશ્વિક સ્તરની સુવિધાઓ પર વિશેષ ધ્યાન કેન્દ્રિત કરવામાં આવ્યું છે.
સુશાસન અને શ્રમ સુધારા: કામદારોની સુરક્ષા અને આર્થિક ખરીદશક્તિમાં વધારો – કનુભાઈ દેસાઈ
છેલ્લા 24 વર્ષના સુશાસન દ્વારા વડાપ્રધાને ભારતને વિશ્વની ચોથી સૌથી મોટી અર્થવ્યવસ્થા બનાવવામાં મહત્વનું યોગદાન આપ્યું છે, જેના ભાગરૂપે ગુજરાત પણ આત્મનિર્ભરતા તરફ આગળ વધી રહ્યું છે. જી.એસ.ટી. (GST) માં કરવામાં આવેલા ઐતિહાસિક સુધારાઓને કારણે સામાન્ય નાગરિકોની ખરીદશક્તિ વધી છે, જેનાથી બજારને વેગ મળ્યો છે. આ ઉપરાંત, શ્રમ અધિનિયમમાં કરવામાં આવેલા ફેરફારો કામદારો માટે આશીર્વાદરૂપ સાબિત થયા છે; તેનાથી માત્ર તેમની સામાજિક સુરક્ષા અને રોજગારીની તકો જ નથી વધી, પરંતુ કામદારોના સન્માન અને જીવનધોરણમાં પણ નોંધપાત્ર સુધારો થયો છે.
