રાજ્યમાં 21 જૂનના રોજ યોજાનારી પોલીસ ભરતીની વિવિધ લેખિત પરીક્ષાઓ મોકૂફ રાખવામાં આવી છે. NEET પરીક્ષાના આયોજન અને વહીવટી વ્યવસ્થાને ધ્યાનમાં રાખીને પોલીસ ભરતી બોર્ડે આ મહત્વપૂર્ણ નિર્ણય લીધો હોવાનું જાણવા મળ્યું છે.
કઈ-કઈ પરીક્ષાઓ પાછી ઠેલવામાં આવી?
મોકૂફ રાખવામાં આવેલી પરીક્ષાઓમાં વાયરલેસ PSI, હેડ કોન્સ્ટેબલ તેમજ ડ્રાઈવર મેકેનિક જેવી પોસ્ટોની લેખિત પરીક્ષાઓનો સમાવેશ થાય છે. હજારો ઉમેદવારો આ પરીક્ષાની તૈયારીમાં વ્યસ્ત હતા ત્યારે અચાનક લેવાયેલા આ નિર્ણયથી ઉમેદવારોમાં ચર્ચાનો માહોલ જોવા મળી રહ્યો છે.
પરીક્ષા મોકૂફ રાખવા પાછળ બોર્ડની દલીલ
પોલીસ ભરતી બોર્ડના સૂત્રો મુજબ, ઉમેદવારોને કોઈપણ પ્રકારની અસુવિધા ન થાય અને પરીક્ષા વ્યવસ્થા સુચારૂ રીતે પાર પડી શકે તે માટે પરીક્ષા મોકૂફ રાખવાનો નિર્ણય લેવાયો છે. બોર્ડ દ્વારા નવી પરીક્ષાની તારીખ ટૂંક સમયમાં સત્તાવાર રીતે જાહેર કરવામાં આવશે.
ઉમેદવારો માટે પોલીસ ભરતી બોર્ડની મહત્વની સલાહ
ઉમેદવારોને સલાહ આપવામાં આવી છે કે તેઓ પોલીસ ભરતી બોર્ડની સત્તાવાર જાહેરાતો અને વેબસાઈટ પર સતત નજર રાખે. નવી તારીખ જાહેર થયા બાદ પરીક્ષાનું સમયપત્રક અને અન્ય સૂચનાઓ પણ પ્રસિદ્ધ કરવામાં આવશે.
