Pakistan vs New Zealand: મોહમ્મદ રિઝવાનની કેપ્ટનશીપમાં પાકિસ્તાની ટીમને ભારે નુકસાન થયું છે. તે ન્યુઝીલેન્ડ સામે 60 રનથી હારી ગયું અને આ સાથે તેનો નેટ રન રેટ પણ ઘણો ઘટી ગયો. પ્રથમ બેટિંગ કરતા ન્યુઝીલેન્ડે 320 રન બનાવ્યા. આ સ્કોર ઓછો તો ન કહેવાય, પણ એટલો મોટો પણ નહોતો કે તેનો પીછો ન કરી શકાય. પરંતુ પાકિસ્તાનની શરૂઆત એટલી ખરાબ હતી કે બાદમાં આક્રમક બેટિંગ કર્યા પછી પણ કંઈ થઈ શક્યું નહીં. પાકિસ્તાનના ઓપનર ફખર ઝમાન ઇનિંગની શરૂઆત કરવા આવી શક્યા નહીં, જે પાકિસ્તાન માટે મોંઘુ સાબિત થયુ. આ બધું ICC ના નિયમોને કારણે થયું.
ફખર ઝમાન ન કરી શકયા પાકિસ્તાન માટે ઓપનિંગ
પ્રથમ બેટિંગ કરતા ન્યુઝીલેન્ડની ટીમે 320 રન બનાવ્યા. આ પછી, જ્યારે પાકિસ્તાની ટીમ બેટિંગ કરવા ઉતરી ત્યારે સઈદ શકીલને ભૂતપૂર્વ કેપ્ટન બાબર આઝમ સાથે ઓપનિંગ કરવા આવવું પડ્યું. ખરેખર તો ફખર ઝમાન જ આવવાના હતા. ન્યુઝીલેન્ડની ટીમ બેટિંગ કરી રહી હતી ત્યારે ફખર ઝમાન ઘાયલ થયો હતો. હજુ તો માત્ર પહેલી જ ઓવર ચાલી રહી હતી અને ફખર ઝમાન ઘાયલ થઈ ગયો. આ પછી તેને પરત જવું પડ્યું અને તે ન્યૂઝીલેન્ડની ઈનિંગ દરમિયાન બેઠો રહ્યો. ICC ના નિયમો અનુસાર, જો કોઈ ખેલાડી આખી ઇનિંગ દરમિયાન ફિલ્ડિંગ ન કરે અને તેની ટીમ બેટિંગ કરવા આવે, તો તેણે 20 મિનિટમાં જ બેટિંગ કરવા આવવું પડશે. એટલે કે ફખર ઝમાન ઓપનિંગ કરી શક્યો નહીં.
ત્રીજા નંબર પર રમવા આવ્યા કેપ્ટન મોહમ્મદ રિઝવાન
આ પછી, સઈદ શકીલ 19 બોલમાં 6 રન બનાવીને આઉટ થયો. સઈદ શકીલ આઉટ થયાને 20 મિનિટ પણ થઈ ન હતી. લગભગ ૩ મિનિટ બાકી હતી. આવી સ્થિતિમાં ફખર ઝમાન ત્રીજા નંબરે પણ બેટિંગ કરવા આવી શક્યો નહીં. કેપ્ટન મોહમ્મદ રિઝવાન ત્રીજા નંબરે બેટિંગ કરવા આવ્યા. પહેલી વિકેટ પડ્યા પછી જ્યારે બાબર આઝમ અને મોહમ્મદ રિઝવાન બેટિંગ કરી રહ્યા હતા, ત્યારે પાકિસ્તાનનો રન રેટ પણ ઘણો ઘટી ગયો હતો. એનો અર્થ એ થયો કે રન ઝડપથી બનાવવાના હતા, પરંતુ બંને વધુ ડોટ બોલ રમી રહ્યા હતા. જ્યારે મોહમ્મદ રિઝવાન 14 બોલમાં ત્રણ રન બનાવીને આઉટ થયો ત્યારે ફખર ઝમાન ચોથા નંબરે બેટિંગ કરવા આવ્યો. ત્યાં સુધીમાં દસ ઓવર રમાઈ ગઈ હતી.
બાબર આઝમ અને ફખર ઝમાન પણ ખૂબ જ ધીમી બેટિંગ કરી
દસ ઓવરનો અર્થ એ થયો કે પહેલો પાવરપ્લે પૂરો થયો. ફખર ઝમાન તેની મોટાભાગની ODI કરિયરમાં ઇનિંગ્સ ઓપનિંગ કરે છે અને તે પહેલી 10 ઓવરમાં ફિલ્ડિંગના નિયમોનો લાભ લઈને મોટો સ્કોર કરે છે પરંતુ 10 ઓવર પછી તે આમ કરવામાં નિષ્ફળ રહ્યો છે. બીજી તરફ, બાબર આઝમ ખૂબ જ ધીમી બેટિંગ કરી રહ્યો હતો. આવી સ્થિતિમાં, ફખર ઝમાનને મોટા શોટ રમવાની ફરજ પડી. તે કેટલીક ઈનિંગ્સમાં સફળ રહ્યો, પરંતુ તે પણ 41 બોલમાં માત્ર 24 રન બનાવીને આઉટ થયો. પાકિસ્તાન માટે મેચ ત્યાં જ પૂરી થઈ ગઈ. આનો અર્થ એ થયો કે પાકિસ્તાનને ક્યાંકને ક્યાંક ICC ના નિયમોને કારણે પણ હારનો સામનો કરવો પડ્યો.
