ICC T20 પાકિસ્તાને 2026ના વર્લ્ડ કપમાં ભારત સામેની ગ્રુપ સ્ટેજ મેચનો બહિષ્કાર કરવાની જાહેરાત કરીને ક્રિકેટ જગતમાં ખળભળાટ મચાવી દીધો છે. આ મેચ 15 ફેબ્રુઆરીએ કોલંબોમાં રમાનારી છે. પાકિસ્તાન સરકારે 1 ફેબ્રુઆરીએ સ્પષ્ટતા કરી હતી કે ટીમ ટુર્નામેન્ટમાં ભાગ લેશે, પરંતુ ભારત સામે મેદાનમાં ઉતરશે નહીં. આ નિર્ણય ભારતીય ઉપખંડમાં ક્રિકેટ બોર્ડ વચ્ચે તણાવના સમયે આવ્યો છે. બાંગ્લાદેશે અગાઉ ભારતમાં સુરક્ષા ચિંતાઓને કારણે T20 વર્લ્ડ કપમાંથી ખસી ગયું હતું, અને તેના સ્થાને સ્કોટલેન્ડનો સમાવેશ કરવામાં આવ્યો હતો. જોકે, વર્લ્ડ કપના ઇતિહાસમાં આ પહેલી વાર નથી જ્યારે કોઈ ટીમ કોઈ ચોક્કસ મેચ અથવા સમગ્ર ટુર્નામેન્ટમાંથી ખસી ગઈ હોય. સુરક્ષા ચિંતાઓ અને રાજકીય પરિસ્થિતિઓને કારણે ભૂતકાળમાં આવા નિર્ણયો ઘણી વખત લેવામાં આવ્યા છે.
EN અને WI એ શ્રીલંકા જવાનો કર્યો ઈન્કાર
1996 શ્રીલંકા ODI વર્લ્ડ કપ દરમિયાન ગૃહયુદ્ધમાંથી પસાર થઈ રહ્યું હતું. ટુર્નામેન્ટના બે અઠવાડિયા પહેલા જ કોલંબોમાં એક બેંક બોમ્બ વિસ્ફોટમાં 91 લોકો માર્યા ગયા હતા. આ ઘટના બાદ, ઓસ્ટ્રેલિયા અને વેસ્ટ ઈન્ડિઝ બંનેએ સુરક્ષા ચિંતાઓને હવાલો આપીને શ્રીલંકા મેચ રમવા જવાનો ઇનકાર કર્યો હતો. જોકે બંને ટીમોને શ્રીલંકા સામે રમવા સામે કોઈ વાંધો નહોતો, પરંતુ સુરક્ષા ચિંતાઓને કારણે તેઓ મુંબઈમાં જ રહ્યા. પરિણામે, શ્રીલંકાને બંને મેચમાં વોકઓવર મળ્યા. આમ છતાં, ત્રણેય ટીમો આગળના રાઉન્ડમાં આગળ વધી.
ઇંગ્લેન્ડે ઝિમ્બાબ્વેનો કર્યો હતો બહિષ્કાર
2003 ODI વર્લ્ડ કપ દરમિયાન ઇંગ્લેન્ડ ઝિમ્બાબ્વેના હરારેમાં રમવાનું હતું. તે સમયે, બ્રિટનની ટોની બ્લેર સરકાર ઝિમ્બાબ્વેના રાષ્ટ્રપતિ રોબર્ટ મુગાબે સામે કડક વલણ ધરાવતી હતી. ઇંગ્લેન્ડની ટીમને ગંભીર સુરક્ષા ચિંતાઓનો સામનો કરવો પડ્યો હતો, જે મેચ પહેલા ધમકીઓથી વધુ ખરાબ થઈ ગઈ હતી. આખરે, નાસેર હુસૈનના નેતૃત્વ હેઠળની ઇંગ્લેન્ડની ટીમે પ્રવાસ રદ કર્યો. ઝિમ્બાબ્વેને વોકઓવર મળ્યો અને ઇંગ્લેન્ડ વર્લ્ડ કપમાંથી બહાર થઈ ગયું.
ન્યૂઝીલેન્ડે જ્યારે કેન્યા જવાનો કર્યો હતો ઈન્કાર
2003 ના વર્લ્ડ કપ દરમિયાન ન્યુઝીલેન્ડે નૈરોબીમાં કેન્યા સામે રમવાનો પણ ઇનકાર કર્યો હતો. ન્યુઝીલેન્ડ ક્રિકેટે જણાવ્યું હતું કે તેમને વિશ્વસનીય માહિતી મળી હતી કે આતંકવાદી સંગઠનો નૈરોબી પર હુમલો કરી શકે છે. પરિણામે, ન્યુઝીલેન્ડે મુસાફરી ન કરવાનો નિર્ણય લીધો, અને કેન્યાને વોકઓવર મળ્યો. કેન્યાએ આ ટુર્નામેન્ટમાં ઇતિહાસ રચ્યો, સેમિફાઇનલમાં પહોંચ્યું.
