મોરબીની રવિરાજ ચોકડી નજીકથી ત્રણ ભેંસના પાડાઓની ગેરકાયદે હેરાફેરી કરતા બે ઇસમોને પોલીસે ઝડપી પાડ્યા છે. આરોપીઓએ બોલેરો ગાડીમાં પાડાઓને ક્રૂરતાપૂર્વક દોરડાથી બાંધીને ઘાસચારો કે પાણીની વ્યવસ્થા વિના હેરાફેરી કરતા હોવાનું સામે આવ્યું છે. આ ઘટના બાદ મોરબી તાલુકા પોલીસે બંને આરોપીઓ સામે પશુ ક્રૂરતા અધિનિયમ હેઠળ ગુનો નોંધી તપાસ હાથ ધરી છે.
જાણવા મળ્યું છે કે, મોરબી તાલુકાના રવાપર નદી ગામના રહેવાસી રામજીભાઈ શીવાભાઈ મૈયડાએ આરોપીઓ મેરામ ઉકાભાઈ ભારાઈ અને રાજુ મંગાભાઈ સોરીયા (રહે. બંને ધોરાજી) સામે ફરિયાદ નોંધાવી છે. ફરિયાદમાં જણાવાયું છે કે, આરોપીઓએ તેમની બોલેરો ગાડી (નંબર: GJ 11 VV 3446)માં કોઈ આધાર-પુરાવા વિના ત્રણ ભેંસના પાડાઓને દોરડાથી બાંધીને ગેરકાયદે હેરાફેરી કરી હતી. આ દરમિયાન પાડાઓને ઘાસચારો કે પાણીની કોઈ વ્યવસ્થા પણ આપવામાં આવી ન હતી.
રવિરાજ ચોકડી પાસેથી આરોપીઓને ઝડપી લઈને બોલેરો ગાડી સહિતનો મુદ્દામાલ પોલીસને સોંપવામાં આવ્યો હતો. મોરબી તાલુકા પોલીસે ફરિયાદના આધારે ગુનો નોંધીને આગળની તપાસ શરૂ કરી છે. આ ઘટનાએ સ્થાનિક વિસ્તારમાં પશુઓ પ્રત્યેની ક્રૂરતા અને ગેરકાયદે હેરાફેરીના મુદ્દે ચર્ચા જગાવી છે.
