રાજ્યમાં એકતરફ ધોરણ 10 અને 12ની બોર્ડની પરીક્ષાઓનો પ્રારંભ થયો છે, ત્યારે બીજી તરફ સરકારી કચેરીઓને બોમ્બથી ઉડાવી દેવાની ધમકી મળતા તંત્ર દોડતું થયું છે. સુરત, વલસાડ અને નવસારી બાદ હવે અમરેલી, બનાસકાંઠા અને પાલનપુરની પોસ્ટ ઓફિસોને પણ ઈ-મેઈલ દ્વારા ધમકી મળતા સુરક્ષા એજન્સીઓ એલર્ટ મોડ પર આવી ગઈ છે.
અમરેલીમાં ઇ-મેઈલથી મળી ધમકી: પોસ્ટ ઓફિસ ખાલી કરાવાઈ
અમરેલીની મુખ્ય પોસ્ટ ઓફિસને બોમ્બથી ઉડાવી દેવાનો ધમકીભર્યો ઈ-મેઈલ મળતા જ હડકંપ મચી ગયો હતો. ઘટનાની ગંભીરતા જોઈને સ્થાનિક પોલીસ, બોમ્બ સ્ક્વોડ અને ફાયર વિભાગ તાત્કાલિક સ્થળ પર પહોંચ્યા. સુરક્ષાના ભાગરૂપે આખી પોસ્ટ ઓફિસ ખાલી કરાવી આસપાસના વિસ્તારમાં સર્ચ ઓપરેશન હાથ ધરવામાં આવ્યું છે.
સાયબર સેલ દ્વારા ઈ-મેઈલ ક્યાંથી આવ્યો તેની તપાસ શરૂ
નવસારી અને ઉત્તર ગુજરાતમાં પણ ભયનો માહોલ ફેલાયો છે. નવસારીના નાગ તલાવડી વિસ્તારમાં આવેલી પોસ્ટ ઓફિસમાં પણ સમાન પ્રકારનો ધમકીભર્યો મેઈલ આવ્યો હતો. ઉચ્ચ પોલીસ અધિકારીઓ અને બોમ્બ ડિસ્પોઝલ સ્કવોડ (BDDS) દ્વારા સઘન ચેકિંગ કરવામાં આવ્યું હતું. જોકે, પ્રાથમિક તપાસમાં કોઈ શંકાસ્પદ વસ્તુ મળી નથી. આ ઉપરાંત, બનાસકાંઠા અને પાલનપુરમાં પણ તંત્રને એલર્ટ કરી દેવામાં આવ્યું છે.
તંત્રની કાર્યવાહી અને નાગરિકોને અપીલ
સુરક્ષા એજન્સીઓ દ્વારા સાયબર તપાસ: ઈ-મેઈલનો સોર્સ શોધવા સાયબર એક્સપર્ટ્સની મદદ લેવાઈ રહી છે. તમામ સંવેદનશીલ સરકારી કચેરીઓ પર પોલીસ પહેરો વધારી દેવાયો છે.
