પ્રધાનમંત્રી નરેન્દ્ર મોદીએ આજે ‘પરીક્ષા પે ચર્ચા 2026’ કાર્યક્રમમાં દેશભરના લાખો વિદ્યાર્થીઓ, વાલીઓ અને શિક્ષકો સાથે સંવાદ સાધ્યો હતો. આ કાર્યક્રમ દરમિયાન PM મોદીએ પરીક્ષાને લઈને થતો માનસિક તણાવ, ભય અને દબાણ અંગે ખુલ્લેઆમ ચર્ચા કરી અને વિદ્યાર્થીઓને આત્મવિશ્વાસ સાથે આગળ વધવા માટે પ્રેરણા આપી.
પ્રધાનમંત્રીએ જણાવ્યું કે પરીક્ષા માત્ર મૂલ્યાંકનનું એક સાધન છે, જીવનની આખરી કસોટી નથી. તેમણે વિદ્યાર્થીઓને સલાહ આપી કે પોતાની ક્ષમતાની તુલના બીજાની સાથે નહીં પરંતુ પોતાના ગત પ્રદર્શન સાથે કરવી જોઈએ. “દરેક વિદ્યાર્થીમાં અલગ પ્રતિભા હોય છે, તેને ઓળખવી અને વિકસાવવી જરૂરી છે,” એમ તેમણે કહ્યું.
કાર્યક્રમ દરમિયાન વિદ્યાર્થીઓએ સમય વ્યવસ્થાપન, સોશિયલ મીડિયા, કારકિર્દી પસંદગી અને નિષ્ફળતાનો સામનો કરવા અંગે પ્રશ્નો પૂછ્યા. PM મોદીએ ઉદાહરણો અને અનુભવોના આધારે જવાબ આપતા જણાવ્યું કે નિષ્ફળતા સફળતાની સૌથી મોટી શિક્ષિકા છે. આ કાર્યક્રમનું દેશભરમાં લાઈવ પ્રસારણ કરવામાં આવ્યું હતું.
