હનુમાન જયંતીએ ડાંગનાં હનુમાન મંદિરોમાં ભક્તોની ભીડ ઉમટી. ભજન, કીર્તન, હવન અને મહાપ્રસાદ સાથે જય બજરંગ બલીનો નાદ ગુંજ્યો. આદિવાસીઓએ આસ્થાપૂર્વક પૂજા કરી.
હનુમાન જયંતીના પવિત્ર પર્વે આજે ડાંગ જિલ્લામાં ભક્તિનો અનેરો ઉલ્લાસ જોવા મળ્યો. વહેલી સવારથી જ જિલ્લાનાં વિવિધ હનુમાન મંદિરોમાં ભાવિક ભક્તોની લાંબી લાંબી કતારો લાગી હતી. જય બજરંગ બલીના નાદથી વાતાવરણ ભક્તિમય બની ગયું હતું.
આહવાના પટેલપાડા અને મારુતિ હનુમાન મંદિર ખાતે મોટી સંખ્યામાં ભક્તો ઉમટ્યા હતા. આ ઉપરાંત, ધોધલી, અટાળાધામ, અંજનકુંડ, બોરખેતના સાગી હનુમાન, બારીપાડા, ભાપખલ, ગોટીયામાળ, વઘઈના મકરધ્વજ હનુમાન અને કિલાદના અંબિકા નદીમાં બિરાજમાન તડકીયા હનુમાન જેવા સ્થળોએ પણ ભાવિકોનો મેળો જામ્યો હતો.
ભક્તોએ તેલ, સિંદૂર અને આંકડાની માળા ચઢાવી, ભાવપૂર્વક પૂજા-અર્ચના કરી. અનેક સ્થળોએ હવન, યજ્ઞ, મહાઆરતી અને ભજન-કીર્તનના કાર્યક્રમો યોજાયા. ખાસ કરીને, આદિવાસી સમુદાયે મોટી સંખ્યામાં હાજરી આપી અને આસ્થાપૂર્વક હનુમાનજીની ઉપાસના કરી.
દિવસ દરમિયાન જિલ્લાનાં વિવિધ સ્થળોએ મહાપ્રસાદ ભંડારનું આયોજન કરવામાં આવ્યું હતું, જેમાં હજારો ભક્તોએ મહાપ્રસાદનો લાભ લીધો. ડાંગના જંગલોમાં જય હનુમાનનો નાદ ગુંજી ઉઠ્યો, જે આખા વિસ્તારને ભક્તિના રંગમાં રંગી દીધો.
આ પર્વે ડાંગના લોકોમાં આધ્યાત્મિક ઉત્સાહ અને એકતાની ભાવના સ્પષ્ટપણે જોવા મળી.
