રાજધાની દિલ્હીમાં ગાયબ લોકોના કેસોમાં ચિંતાજનક વધારો નોંધાયો છે. પોલીસ દ્વારા જાહેર કરાયેલા તાજા આંકડાઓ મુજબ, જાન્યુઆરી મહિનાના પ્રથમ પંદર દિવસ દરમિયાન 800થી વધુ લોકો ગાયબ થયાની ફરિયાદો નોંધાઈ છે, જે શહેરની સુરક્ષા વ્યવસ્થા પર ગંભીર પ્રશ્નો ઊભા કરે છે.
ગાયબ થયેલાઓમાં 500થી વધુ મહિલાઓ અને યુવતીઓનો સમાવેશ થાય છે, જ્યારે લગભગ 190 બાળકો અને કિશોરો પણ આ યાદીમાં છે. પોલીસ જણાવે છે કે અત્યાર સુધીમાં આશરે 235 લોકોને શોધી કાઢવામાં સફળતા મળી છે, જોકે 570થી વધુ લોકો હજુ પણ લાપતા છે.
અધિકારીઓ અનુસાર, ગાયબ થવાના પાછળ ઘરેલું વિવાદ, રોજગાર માટે સ્થળાંતર, માનસિક તણાવ તથા અન્ય સામાજિક કારણો જવાબદાર હોઈ શકે છે. તેમ છતાં, દરેક કેસને ગંભીરતાથી લઈ અલગ-અલગ ટીમો દ્વારા તપાસ અને શોધ કામગીરી સતત ચાલુ રાખવામાં આવી છે.
પોલીસ તંત્ર દ્વારા નાગરિકોને અપીલ કરવામાં આવી છે કે કોઈ વ્યક્તિ ગુમ થવાની સ્થિતિમાં વિલંબ કર્યા વિના તાત્કાલિક નજીકના પોલીસ સ્ટેશનમાં ફરિયાદ નોંધાવવી જોઈએ. સાથે જ, મહિલાઓ અને બાળકોની સુરક્ષા સુનિશ્ચિત કરવા માટે વધારાના પગલાં લેવાની જરૂરિયાત પર પણ ભાર મૂકવામાં આવ્યો છે.
વધતા જતા ગાયબ લોકોના આંકડાઓને લઈ શહેરમાં ચિંતા અને ચર્ચાનો માહોલ સર્જાયો છે, જ્યારે પ્રશાસન દ્વારા સ્થિતિ પર કડક નજર રાખવામાં આવી રહી છે.
— સીમાં તિવારી
